Ацумыжъ Адамэ идокументальнэ проектэу «Культурэм иухъумакӀохэр» зыфиӀорэм иапэрэ къэгъэлъэгъон VKontakte-м къыралъхьэщт щылэ мазэм и 21-м, телевизэрым ар щылэ мазэм и 30-м сыхьатыр 17:00-м Урысые 1-м къыщагъэлъэгъощт, — Джащ фэдэу къетхы «Советскэ Адыгеим».
Адыгэ лъэпкъым иэтнографие, итеплъэ искусствэ зэхифыхэзэ, адыгэ культурэр непэрэ уахътэм щыпсэурэ Ӏахьэу къыгъэлъэгъонэу проектыр зэхащагъ. Сериалэу зыбжанэу зэхэтхэр Адыгэ Республикэм шэкӀогъу мазэм щытырахыгъэх. ӀэпэӀасэхэр, орэдыӀохэр, пшысэӀохэр, кӀэлэегъаджэхэу шэн-хабзэхэр къэухъумэгъэнхэр ямафэ къэс пшъэрылъ зыфэхъугъэхэр ащ хэтых.
Тигухэлъ артефактхэр е шэн-хабзэхэр къэгъэлъэгъонхэ къодыеу щытэп, ахэм лъэпкъым ыпсэ къахэтлъэгъожьынэу ары, къыӀуагъ Адыгэ къэралыгъо телерадиокомпанием ипащэу, проектым икъежьакӀоу Ацумыжъ Адамэ.
Проектым илӀыхъужъхэр тилъэхъанэгъухэу, яӀофшӀагъэкӀэ, язэчыйкӀэ адыгэ культурэм итарихъ псау мафэ къэс зытхыжьхэрэр, ащ ишэн-хабзэ, итеплъэ лъапсэу иӀагъэр шӀушӀэ гъэсэпэтхыдэу, тапэкӀэ щыӀэщтым игъэпсын лъапсэу къэзыухъумэхэрэр ары зэрэхъурэр, Ацумыжъым къыхигъэхъожьыгъ.
Адыгэм икультурэ кӀэн ӀэкӀыб къэралхэм ащыпсэурэ тилъэпкъэгъухэм, нэмыкӀхэм ащыдгъэгъозэнхэм фэшӀ къыдэкӀыщт къэтын пстэури тырку ыкӀи инджылыз бзэхэмкӀэ зэдзэкӀыгъэ хъущт.
Comments
Post a Comment