Адыгеим и ЛIышъхьэу КъумпIыл Мурат Урысыем псэолъэшIынымкIэ ыкIи псэупIэ-коммунальнэ хъызмэтымкIэ иминистрэу Владимир Якушевым Москва щыIукIагъ. Лъэпкъ проектэу «Жилье и городская среда» зыфиIорэр республикэм зэрэщагъэцакIэрэм, унэхэм яшIынкIэ проект финансированием зэрэтехьащтхэ шIыкIэм лъэныкъохэр атегущыIагъэх.
Джащ фэдэу зэIукIэгъум хэлэжьагъэх Адыгеим ыцIэкIэ сенаторэу Хъопсэрыкъо Муратрэ Адыгэ Республикэм псэолъэшIынымкIэ, псэупIэ-коммунальнэ, гъогу хъызмэтымкIэ иминистрэу Валерий Картамышевымрэ.
Адыгеим и ЛIышъхьэ къызэриIуагъэмкIэ, цIыфхэмкIэ Iэрыфэгъоу щытыщт унэ дэгъухэр гъэпсыгъэнхэм, социальнэ, инженер инфраструктурэ хьазырыр зиIэ, зыщызэтегъэпсыхьэгъэ микрорайонхэр шIыгъэнхэм республикэм лъэшэу анаIэ щытырагъэты. Республикэм иIэшъхьэтетхэм япшъэрылъхэм зэу ащыщ муниципальнэ образование пстэуми зэдиштэу псэолъэшIыным защегъэушъомбгъугъэныр.
«Сэ республикэм имуниципалитетхэм япащэхэм пшъэрылъ афэсшIыгъ псэолъэшIхэм ренэу зэпхыныгъэ адыряIэнэу, Iизын къазэрэратырэ документацием изэхэгъэуцонкIэ пIалъэхэр амыукъонхэу», — хигъэунэфыкIыгъ КъумпIыл Мурат.
Лъэпкъ проектэу «Жилье и городская среда» зыфиIорэм къыдыхэлъытагъэу республикэм шъолъыр, муниципальнэ проект гъэнэфагъэхэм Iоф щадашIэ. ГущыIэм пае, 2019-рэ илъэсым псэупIэ квадрат метрэ мин 271-рэ атынэу рахъухьэ. Фэтэрыбэу зэхэт уни 142-у квадрат метрэ мин 783-рэ зэлъызыубытыщтхэм апае джыдэдэм Iизын тхылъ 55-рэ республикэм щаратыгъ.
Джащ фэдэу зэIукIэгъум хэлэжьагъэхэр псэолъэшIынымкIэ мылъкур къызэратIупщыщт шIыкIакIэм зэрэтехьащтхэм тегущыIагъэх. 2019-рэ илъэсым бэдзэогъум и 1-м къыщегъэ-жьагъэу ащ фэдэ шIыкIэм техьащтых, унэм щыпсэущтхэм ямылъку занкIэу псэолъэшIыным халъхьаныр ащ щегъэзые.
«Федеральнэ пащэхэм унашъоу ашIыгъэм мэхьанэшхо зэриIэр къыдгурэIо. Ащ фэдэ шIыкIэм унэм щыпсэущтхэм ямылъку псэолъэшI нэхъоинчъэхэм ащиухъумэщт, джащ фэдэу игъом псэолъэшIын IофшIэнхэр зэшIохыгъэ хъущтых», — къыIуагъ Адыгеим и ЛIышъхьэ.
Урысыем псэолъэшIынымкIэ ыкIи псэупIэ-коммунальнэ хъызмэтымкIэ иминистрэу Владимир Якушевым псэолъэшIынымкIэ отраслэм иIофшIэн защамыгъакъоу тIэкIу-тIэкIузэ шIыкIакIэм зэрэтехьанхэ фаер хигъэунэфыкIыгъ. Министрэм ишIошIкIэ, мыщкIэ анахьэу мэхьанэ зиIэр шъолъырым ихэбзэ Iэшъхьэтетхэр, банкхэр, псэолъэшIхэр зэгурыIонхэр ары.
Адыгеим и ЛIышъхьэ зэрэхигъэунэфыкIыгъэмкIэ, ащ фэдэ зэдэлэжьэныгъэ Адыгеим щызэдыряI. Муниципалитетхэм япащэхэм, ведомствэхэм, банкхэм, псэолъэшIыным фэгъэзэгъэ фирмэхэм ялIыкIохэр зыхэлэжьэхэрэ зэхэсыгъохэм Iофыгъоу къэуцухэрэм щатегущыIэх.
Адыгэ Республикэм и ЛIышъхьэ ипресс-къулыкъу
Comments
Post a Comment