Адыгэ Республикэм исамбэ ыкӀи дзюдо еджапӀэу Лъэустэнхьаблэ дэтым икӀэлэеджакӀоу, адыгэ самбистэу Едыдж Разыет Урысые Федерацие самбэ зэнэкъокъоу Александр Матросовым фэгъэхьыгъэу Псков шъолъырым икъалэу Великие Луки щыкӀуагъэм текӀоныгъэр къыщыдихыгъ. Ащ фэгъэхьыгъэ къэбарыр республикэм и Теуцожь район иадминистрацие къигъэӀугъ.
Урысые Федерацием ишъолъыр 23-мэ къарыкӀыгъэ спортсмени 130-рэ зэнэкъокъум хэлэжьагъ. Физикэ культурэмрэ спортымрэкӀэ къэралыгъо академиеу Великие Луки дэтым испорт комплекс зэнэкъокъур щыкӀуагъ.
Адыгеим щыщ Едыдж Разыет самбэмрэ дзюдомрэкӀэ Лъэустэнхьаблэ еджапӀэм ыцӀэкӀэ зэнэкъокъум хэлэжьагъ, ионтэгъугъэ елъытыгъэу апэрэ чӀыпӀэр къыдихыгъ. Урысые Федерацием спортымкӀэ имастер шапхъэ ыгъэцэкӀагъ.
Comments
Post a Comment