ИгъэкIыгъэным IэпыIэгъу етыгъэнымкIэ Адыгэ Республикэм и Гупчэ Казахстан Республикэм щыщ псэушIакIохэр Адыгеим къыригъэблэгъагъэх. ШэкIогъум и 7-м хьакIэхэмрэ Адыгеим ипсэушIакIохэм ащыщхэмрэ Гупчэу «Си ПсэушIэ» зыфиIорэм зэдэгущыIэгъухэр щыряIагъэх.
«Си ПсэушIэ» Гупчэм ипащэу КIыкI Артур къызэриIуагъэмкIэ, Казахстан ипсэушIакIохэм илъэс заулэ хъугъэу зэпхыныгъэ адыряI. Адыгеим къыщыдагъэкIыхэрэр ахэм агу рехьы, ащэфы, яхэгъэгу щыIуагъэкIы. Ары къырагъэблэгъэнхэм ушъхьагъу шъхьаIэ фэхъугъэр.
БлэкIыгъэ 2022-рэ илъэсыр пштэмэ, тиреспубликэ къыщашIыгъэу доллар миллиони 2,5-рэ фэдиз зыосэ къыдэгъэкIыгъэхэ типредпринимательхэм Казахстан щыIуагъэкIыгъ, — КIыкI Артур къыIуагъ . — Мы илъэсым а пчъагъэр нахьыбэ хъунэу пэшIорыгъэшъэу къэтлъытагъ. ГущыIэм пае, щылэ мазэм къыщыублагъэу непэ нэсэу къэплъытэмэ, доллар миллиони 2-м ехъу зытефэрэ къыдэгъэкIыгъэхэ ащагъ ыкIи щыIуагъэкIыгъ, илъэсым ыкIэм нэс доллар миллиони 3-м нэсынэу тэгугъэ.
Гупчэм ипащэ къызэриIуагъэмкIэ, япсэушIакIохэм зэгурыIоныгъэ азыфагу илъэу зэдэлажьэх. Адыгеим къыщашIырэ гъомылапхъэхэр чIыопс къэухъумэным ишапхъэхэм адиштэхэу Казахстан ипсэушIакIохэм алъытэ, ахэр ары нахьыбэу къызкIэупчIэхэрэр.
IэкIыбым къикIыгъэ хьакIэхэр мэфищырэ Адыгеим щыIэщтых. Iофыгъом къызэрэдэлъытагъэмкIэ, хъызмэтшIапIэхэр къакIухьащтых, къыдагъэкIыхэрэм нэIуасэ зыфашIыщт.
Мыщ фэдэ зэIугъэкIэгъухэр псэушIакIохэм IэпыIэгъу ятыгъэнымкIэ Адыгэ Республикэм и Гупчэ зэрэзэхищэрэр апэрэп. ЫпэкIэ Республикэу Беларусь ипсэушIакIохэр къырагъэблэгъагъэх.
Comments
Post a Comment