КъумпIыл Мурат - Метин Озкан
Адыгэ Республикэм и Хэкузещэ (правительствэ) и Унэ шъкIогъум и 27-м зэIукIэгъу щызэдыряIагъ Адыгеим и ЛIышъхьэу КъумпIыл Муратрэ Тырку Республикэм и консул шъхьаIэу къалэу ЦIэмэз щыIэ Метин Озканрэ. Джащ фэдэу Адыгэ Республикэм и ЛIышъхьэ ипресс-къулыкъу къеты.
2023-рэ илъэсым чъэпыогъум а IэнатIэм ар Iуагъэхьэгъагъ ыкIи республикэм нэIуасэ зыфишIын гухэлъ иIэу къэкIуагъ. Ащ игъусагъэх Тырку Республикэм и консул-шъхьаI сатыу IофхэмкIэ иатташеу Айданур Авджи Танышрэ консул-шъхьаIым иапэрэ секретарэу Севиля Шейховамрэ.
Адыгеимрэ Тыркуемрэ язэфыщытыкIэхэм ягъэпытэн къыдыхэлъытагъэу язэпхыныгъэхэм хэхъоныгъэ ягъэшIыгъэным иIофыгъохэм зэIукIагъэхэр атегущыIагъэх. Ащ хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, АР-м и ЛIышъхьэ иIэпыIэгъоу Хьакъунэ Беллэ, УФ-м IэкIыб къэрал IофхэмкIэ и Министерствэ и ЛIыкIо IофшIапIэ иапэрэ секретарэу Игорь Терзиян.
Адыгэ Республикэм и ЛIышъхьэу КъумпIыл Мурат къыхигъэщыгъ урысые-тырку зэфыщытыкIэхэм ягъэпытэн иIахьышIу хишIыхьаным республикэр зэрэфэхьазырыр. А гухэлъыр зыдиIыгъэу Адыгеир ежь зыфэгъэзэгъэ лъэныкъохэм къапкъырыкIызэ товархэу ащ IэкIигъахьэхэрэр нахьыбэ зэришIыщтым ыкIи Тыркуем дыриIэ сатыу-экономикэ, культурнэ-гъэсэныгъэ зэпхыныгъэхэм зягъэушъомбгъугъэным, шIушIэ проектхэу Тыркуем щыпсэурэ адыгэхэм япхыгъэхэр гъэцэкIагъэ хъунхэм адэлажьэ.
Тыркуем и консул шъхьаI къыIуагъ чIыгусысыным зэрар къызфихьыгъэхэм IэпыIэгъу зэраратыгъэм пае къызэрафэразэр ыкIи Тырку Республикэм и ЛIыкIоу Москва щыIэм ыцIэкIэ шIуфэс гущыIэхэр къалъигъэIэсыжьыгъэх.
ИкIэухым къызэрэхагъэщыгъэмкIэ, лъэныкъуитIумкIи федэ къэзыхьырэ зэдэлэжьэныгъэм IофшIэным илъэныкъо зэфэшъхьафхэр къызэлъиубытынхэ фае. Сатыу ыкIи экономикэ зэпхыныгъэхэр, культурэмкIэ, гъэсэныгъэмкIэ, шIэныгъэ ыкIи псапэ проектхэмкIэ язэдэлэжьэныгъэ тапэкIи хэхъоныгъэ егъэшIыгъэным мэхьанэшхо зэриIэр къыхагъэщыгъ.
Comments
Post a Comment