Мы мазэм иапэрэ мафэхэм, Адыгэ Республикэм и лIышъхьэу КъумпIыл Мурат республикэм и хэкузещэ зычIэт унэм Тыркуем и парламент хэт депутатхэмрэ Адыгэ-Кавказ псэушIакIохэм я хасэ (КАФИАД) хэтхэмрэ зэIукIэгъу щадыриIагъ,- джащ фэдэу Адыгэ Республикэм илIышъхьэ ипресс къулыкъу къетхы.
Тыркуем илIыкIохэу зэIукIэгъум хэлэжьагъэхэр Адыгеим щыпсэухэрэмрэ ащ ипащэхэмрэ къафэгушIуагъэх Адыгеир илъэси I00 зэрэхъугъэм фэшI ыкIи республикэм тапэкIи хэхъоныгъэшхо-хэр ышIынэу къыфэлъэIуагъэх.
Адыгеим къызэрэкIуагъэхэм фэшI хьэкIэ лъапIэхэм зэрафэразэр ариIуи, республикэр Тыркуем лъэныкъо зэфэшъхьафхэмкIэ зэдэлэжьэныгъэу дыриIэм зызэрэригъэушъомбгъурэр КъумпIыл Мурат къыхигъэщыгъ.
«Тикъэралыгъохэм япащэхэу Владимир Путинымрэ Реджеп Эрдоганрэ язэпхыныгъэхэм нахь заушъомбгъу. IэкIыб къэралыгъохэм, адыгэ нэбгырэ миллион пчъагъэ зыщыпсэурэ Тыркуери ахэм зэрахэтэу, зэпхыныгъэу адытиIэр гъэпытэгъэнэу федеральнэ гупчэм зэрилъытэрэм Адыгейми дырегъаштэ», — къыIуагъ КъумпIыл Мурат.
«Адыгеим къэралыгъо гъэпсыкIэ иIэ зыхъугъэм ия I00-рэ илъэс мыгъэ хэтэгъэунэфыкIы. Къихьащт илъэсым Тыркуер зызэхащагъэр илъэси I00 хъущт. Ахэр мэхьанэшхо зиIэ хъугъэ-шIагъэх. Адыгеимрэ Тыркуемрэ тапэкIи язэпхыныгъэхэр нахь зэрэпытэщтхэм, язэфыщытыкIэхэм зызэраушъомбгъущтым тицыхьэ телъ», — къыIуагъ КъумпIыл Мурат.
Тыркуем къикIыгъэхэу Байбатур Мурат, Байяр Фырат, Таймаз Юсыф ыкIи нэмыкIхэри зэIукIэгъум къыщыгущыIагъэх. БизнесымкIи культурэмкIи язэдэлэжьэныгъэ зырагъэушъомбгъу, къэралыгъуитIуми язэпхыныгъэхэр агъэпытэ зэрашIоигъор хьакIэхэм къаIуагъ.
«Республикэм къэралыгъо гъэпсыкIэ зэриIэр илъэси I00 зыщыхъурэм Адыгеим тыкъызэрэкIуагъэр лъэшэу тигуап. Мы хъугъэ-шIэгъэшхом тизэпхыныгъэхэм нахь зызэраушъомбгъущтым игугъапIэ къыпхелъхьэ», — къыхигъэщыгъ КАФИАД-м итхьаматэу Таймаз Юсыф.
Адыгеимрэ Тыркуемрэ сатыу- экономикэ зэдэлэжьэныгъэу зэдыряIэм епхыгъэ нэмыкI Iофыгъохэми зэIукIэгъум щатегущыIагъэх.
Шъущытэгъэгъуазэ
Адыгэ сайтым къидгъэуцорэ тхыгъэхэм, лъэкIэу тиIэмкIэ мыАдыгэ гущыIэхэр къыхэтымыгъэфэнэу тыдэлажьэ. Адыгэ гущыIэкIэхэри къэтэгупщысых. Ахэм нахь дахэу гущыIэхэр шъуиIэмэ, мы тхыгъэм икIэгъкIэ шъукъэтхэн шъулъэкIыщт.
Мы тхыгъэм мы гущыIэкIэхэр ары къыхэдгъэхьагъэхэр:
ПсэушIакIохэм - бизнесменхэм
Хэкузещэ - правительства
Comments
Post a Comment