Адыгэ Ресубликэм и ЛIышъхьэу КъумпIыл Мурат Узбекистан Республикэм и консул шъхьэIэу Ростов-на-Дону щыIэ Рустам Курганбаевым гъэтхапэм и 25-м Мыекъуапэ щыIукIагъ. Адыгеимрэ Узбекистанрэ язэдэлэжьэныгъэ зырагъэушъомбгъунымкIэ амалэу щыIэхэм ахэр атегущыIагъэх,- джащ фэдэу Адыгэ Республикэм и ЛIышъхьэ ипресс-къулыкъу къетхы.
ЗэIукIэм хэлэжьагъэх Адыгэ Республикэм и премьер-министрэ ипшъэрылъхэр зыгъэцакIэу КIэрэщэ Анзаур ыкIи нэмыкIхэр..
Узбекхэм ныбджэгъу зэфыщытыкIэхэр бэшIагъэу зэрадыряIэр, язэдэлэжьэныгъэ лъагъэкIотэным мэхьанэшхо зэрэратырэр ЛIышъхьэм хигъэунэфыкIыгъ.
КъумпIыл Мурат къызэрэригъэблэгъагъэр зэригуапэр, Узбекистан Урысые Федерацием ишъолъырхэм зэдэлэжьэныгъэу адыриIэм зырагъэушъомбгъунэу ахэр мыщ къызэрэкIуагъэхэр консулым къыхигъэщыгъ.
Экономикэ зэпхыныгъэхэм бгъуитIури игъэкIотыгъэу тегущыIагъэх ыкIи зэфэшъхьаф лъэныкъохэм Iофыхэр лъагъэкIотэнэу зэдащтагъ.
Comments
Post a Comment