2021 илъэс. Тыгъэгъазэм и 18-м Иорданием къикIэу къэбар гухэкI къытлъыIэсыгъ: илъэс 87-м итэу тиныбджэгъу нахьыжъ лъапIэу Хъурмэ Хьасан идунэе хьаф ыухыгъ.
Хьасан 1935-рэ илъэсым къ. Амман къыщыхъугъ, Александрие (Мысыр) университетым мэкъу-мэщымкIэ ифакультет къыухыгъ, Иорданием мэкъу-мэщымкIэ и Министерствэ щылэжьагъ. Ащ къыкIэлъыкIогъэ илъэсхэм, 1974-рэ илъэсым нэс, предпринимателэу, етIанэ акционер компаниеу «Аль-Барус. Инвестиции в Кавказ» зэхищагъ ыкIи ащ идиректорхэм ясовет итхьаматэу ищыIэныгъэ гъогу екIуфэ лэжьагъэ. Ащ дакIоу хэкум ишIуагъэ ригъэкIын ихьисапэу «Аль-Барусыр» иучредителэу, ихэгъэгогъу нэбгырэ 50-м ехъу хэтэу ООО-у «Санрайз» Адыгеим щызэхищагъ ыкIи ащ ыцIэкIэ ООО-у «Мир — Центрэм» хахьи Iоф ышIагъ, псэолъэшIыным, чIыгулэжьыным, чэтхъуным иIахьышIу ахишIыхьагъ.
Хъурмэ Хьасан хэкур шIудэдэ зылъэгъурэмэ ащыщыгъ. Экономикэм дакIоу, общественнэ щыIакIэми чанэу хэлажьэзэ ищыIэныгъэ гъогу къыкIугъ: 1936 — 1986-рэ илъэсхэм Иорданием и Адыгэ Хасэ иказначей IэнатIэ зэрихьагъ, 1997 — 1999-рэ илъэсхэм Хасэм итхьамэтагъ, илъэс пчъагъэ хъугъэу адыгэ нахьыжъхэм я Советэу Иорданием и Пачъыхьэ дэжь щызэхэщагъэм хэтыгъ. Адыгэ тхакIохэм ятхылъхэр арапыбзэм илъхьэгъэнхэм, къыдэгъэкIыгъэнхэм, еджакIохэм аIэкIэгъэхьэгъэнхэм, хэкум иартистхэр егъэблэгъэгъэнхэм ишъыпкъэу ахэлажьэщтыгъ. Косовэ къикIыжьыгъэ адыгэхэм ящыIакIэ хэкум щызэтегъэпсыхьажьыгъэным фэгъэхьыгъэ Iофыгъохэм мылъкукIи зэхэщэн IофкIи иIахьышIу ахилъхьагъ.
Тэ, иныбджэгъугъэхэмкIи икъотэгъугъэхэмкIи, Хьасан зэрэхэкупсагъэр, зэрэныбджэгъу хьалэлыгъэр, зэрэцIыфышIугъэр, шъыпкъэныгъэ зэрэхэлъыгъэр ренэу тыгу илъыщт. Тхьэм телъэIу джэнэткIэ ыгъэгушIощт быслъымэнмэ ащыщ ышIынэу, ишъхьэгъусэу Сухьадрэ ибын-къорэлъф-пхъорэлъфхэмрэ псауныгъэ пытэ яIэу бэрэ кIэлъыпсэунхэу.
Ныбджэгъу куп
Comments
Post a Comment