Адыгэ Республикэм и Теуцожь районымкIэ къуаджэу Пэнэжьыкъуае дэт гурыт еджапIэу N 1-м ия 8-рэ класс ис пшъэшъэжъыеу Хьахъужъэкъо Марианнэу машIом ышыпхъухэр щызыухъумагъэм Адыгеим и ЛIышъхьэу КъумпIыл Мурат ФедерациемкIэ Советым инэпэеплъ медалэу «ЛIыхъужъныгъэ зэрэзэрихьагъэм пае» зыфиIорэр Адыгэ Республикэм и Правительствэ и Унэ щыритыжьыгъ. РеспубликэмкIэ ащ фэдэ медаль апэрэу зэратыгъэр а пшъэшъэжъыер ары.
Медалыр къыритыжьзэ Адыгэ Республикэм и ЛIышъхьэ къызэрэхигъэщыгъэмкIэ, илъэсэу икIыгъэм ФедерациемкIэ Советым лIыхъужъныгъэ зезыхьэгъэ, цIыфхэр къэзыгъэнэжьыгъэ кIэлэцIыкIухэм апае ар ыгъэнэфагъ.
«ФедерациемкIэ Советым и Тхьаматэу Валентина Матвиенкэм бэмышIэу зэIукIэгъу дысиIагъ, республикэм ихэхъоныгъэ илъэныкъохэм ащ тащытегущыIагъ. Непэ сигуапэу ФедерациемкIэ Советым итын къэзылэжьыгъэм IэкIэсэгъэхьажьы. Марианна, мыщ фэдэ медаль АдыгеимкIэ оры апэрэу къызэратырэр. Ау лIыхъужъэу тиIэр макIэп. ШэнышIу хъугъэ мыщ фэдэ Iофтхьабзэхэр зэхэщэгъэнхэр, цIыфхэм якъэгъэнэжьын епхыгъэ блэнэгъэ зекIуакIэ къызхэфэгъэ кIэлэцIыкIухэм ящытхъу тIоныр», — къыхигъэщыгъ КъумпIыл Мурат.
Адыгеим и ЛIышъхьэ джащ фэдэу Марианнэ нэпэеплъ шIухьафтын ритыгъ ыкIи зэрэфэразэр риIуагъ. КъумпIыл Мурат къызэрэхигъэщыгъэмкIэ, ащ фэдэ зекIуакIэхэр пстэуми зэлъягъэшIэгъэнхэ фае.
2021-рэ илъэсым гъэтхапэм и 15-м пчыхьэм зэшыпхъуищ зэрысыгъэ унэм къыкIэнагъ. Анахьыжъэу илъэс 12 зыныбжь Марианнэ электрооборудованием щыкIагъэ зэрэфэхъугъэм къыхэкIэу Iугъуамэр къызыкIаом щтагъэп. Ышыпхъоу Аринэ къыIэти, Анеттэу чъыерэр къыгъэущи, ахэр игъусэхэу унэм къилъэтхи, янэрэ ышнахьыжъэу Руслъанрэ адэжь чъагъэх. А лъэхъаным гъэмэфэ пщэрыхьапIэу щагум дэтым ахэр щыIагъэх. Янэ псынкIэу дежурнэ диспетчерым фытеуагъ ыкIи мэшIогъэкIуасэхэр такъикъищкIэ къэсыгъэх, машIори агъэкIосэжьыгъ.
«УныбжьыкIэми, лIыхъужъныгъэ зепхьагъ. Щынэгъо чIыпIэ узефэм, тэрэзэу узекIуагъ, пшыпхъу нахьыкIэхэр къэбгъэнэжьыгъэх, о пшъхьэ къырыкIощтым уегупшысагъэп», — къыIуагъ Адыгэ Республикэм и ЛIышъхьэ.
Урысыем и МЧС Адыгэ РеспубликэмкIэ и ГъэIорышIапIэ ипащэу, полковникэу Станислав Илющенкэм Рэзэныгъэ тхылъ пшъэшъэжъыем къыритыгъ ыкIи чIыпIэ зэжъум Марианнэ хэкIыпIэ къызэрэфигъотыгъэр, мэшIогъэкIуасэхэм псынкIэу зэрахьэгъэ Iофтхьабзэхэм яшIуагъэкIэ цIыфышъхьэ зэрэхэмыкIодагъэр -къыхигъэщыгъэх.
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Адыгэ Республикэм гъэсэныгъэмрэ шIэныгъэмрэкIэ иминистрэу КIэрэщэ Анзаур Марианнэ къыфэгушIуагъэх, гущыIэ фабэхэр къыраIуагъэх.
Пшъэшъэжъыем ятэу Аслъанрэ янэу Марзетрэ мы Iофтхьабзэм хэлэжьагъэх. Ахэр къызэгущыIэхэм республикэм иIэшъхьэтетхэм ыкIи Адыгеим и ЛIышъхьэ ялъфыгъэ изекIуакIэ уасэ къызэрэфашIыгъэм пае зэрафэразэхэр къыхагъэщыгъ.
Адыгеим и ЛIышъхьэ икIэухым къызэриIуагъэмкIэ, сабыибэ зэрыс Хьахъужъэкъо унагъом тэрэзэу якIэлэцIыкIухэр зэрапIухэрэр, ахэм япшъэшъэжъые фэдэ зекIуакIэ къызхафэхэрэр республикэм щыпсэухэрэмкIэ щысэ хъунхэ фае.
«О теубытагъэу, блэнагъэу пхэлъыр, IэпыIэгъу зищыкIагъэм удеIэным узэрэфэхьазырыр уилэгъухэмкIэ щысэшIу орэхъу», — къыIуагъ КъумпIыл Мурат Марианнэ зыкъыфигъазэзэ.
Адыгэ Республикэмм и ЛIышъхьэ ипресс-къулыкъу
Comments
Post a Comment