Адыгэ республикэм щыпсэурэ тичIыгогъу лъапIэхэр! Ти республикэ гупсэ непэ имаф, зызэхащагъэр илъэс 30 зэрэхъугъэр хэтэгъэунэфыкIы.
МэфэкI дахэмкIэ сыгу къыздеIэу сышъуфэгушIо!
Илъэс 30-м къыкIоцI Адыгеим къини, тхъагъуи зыхэлъ гъогу къызэринэкIыгъ, зыпкъ итыныгъэ иIэу, зэхъокIыныгъэшIухэр ышIыхэзэ лъэкIуатэ. Урысые Федерацием хэхьэрэ шъолъырхэм афэдэу тиреспублики хэгъэгум ипащэхэм адэлэжьэнэу, проект инхэр гъэцэкIэгъэнхэмкIэ, цIыфхэм ящыIакIэ нахьышIу шIыгъэнымкIэ амалышIухэр иIэх.
Урысыем и Президентрэ и Правительствэрэ яшIуагъэкIэ, зыпкъ итыныгъэ иIэу экономикэм, социальнэ лъэныкъом заужьы. Ти Президентэу Владимир Путиным къыгъэнэфэгъэ пшъэрылъхэр гъэхъагъэ хэлъэу тэгъэцакIэх, къэралыгъошхомкIи, тиреспубликэкIи щыIэкIэ нахьышIум игъэпсын фэIорышIэрэ проектхэм тадэлажьэ. Къоджэ псэупIэхэм язэтегъэпсыхьанкIэ Iофыбэ зэшIотэхы. Джащ фэдэу мэкъу-мэщым, гъэсэныгъэм, медицинэм, спортым зязыгъэушъомбгъущт пшъэрылъхэм тадэлажьэ.
Адыгеим щызэдэпсэурэ лъэпкъыбэхэм мамырныгъэ, зэгурыIоныгъэ, лъытэныгъэ азыфагу илъ, шъхьакIэфэныгъэ зэфыряI. Ахэм якультурэ, яшэн-хабзэхэм якъэухъумэн, ягъэлъэпIэн ренэу тынаIэ тет.
ЧIынэлъэ гупсэм щыпсэухэрэм хэкум шIулъэгъоу фыряIэм, тарихъыр, шэн-хабзэхэр зэрагъэлъапIэхэрэм, зэфыщытыкIэ дахэу азыфагу илъым яхьатыркIэ, сицыхьэ телъ, тапэкIи мамырныгъэр, лъэпкъ ыкIи дин зэгурыIоныгъэр къаухъумэнэу, щагъэпытэнэу, тихэгъэгушхоу Урысые федерацием, Адыгэ республикэм хэхъоныгъэ ашIынымкIэ ягухэлъышIу пстэури къадэхъунэу.
Ныбджэгъу лъапIэхэр! Псауныгъэ пытэ шъуиIэу, шъуиунагъохэм дэрмэныр, рэхьатныгъэр арылъэу, шъуиджэныкъо машIо мыкIуасэу, гушIуагъор къышъобэкIэу, тиреспубликэ гупсэ нахь кIэракIэ, зэтегъэпсыхьагъэ хъуным фэIорышIэщт шъуи IофышIухэр къыжъудэхъунхэу сышъуфэлъа1о! ЗэгурыIоныгъэрэ зэдэIужьрэ, гушIуагъорэ тхъагъорэ илъэу тиреспубликэ орэпсэу!
Адыгэ Республикэм илIышъхьэу КъумпIыл Мурат
Къызхэтхыгъэр: facebook
Comments
Post a Comment