Къалэу Мыекъуапэ илъэс 30 узэкlэlэбэжьмэ адыгэ лъэпкъ къашъомкlэ кlэлэцlыкlу купэу "Мыекъуапэ инэфылъэхэр" щызэхащэгъагъ. Ыкlи адыгэ къэшъуакlэм ащ фэдизым щыфагъасэх. Илъис 5 щегъэжьагъэу сабыйхэр мыщ ащэх. Купым ипащэу Нэныжъ Айдамир ыкlи зэкlэ кlэлэегъэджэу щылажьэхэрэр "Налмэсым" е хэтыгъэх, е джы хэтых. "Налмэсым" икъэшъокlэ шlыкlэхэм атетэу къэшъокlо ныбжьыкlэхэр мыщ щагъасэх.
Пшъэшъэжъые ыкlи шъэожъые нэбгыри 100 фэдиз джырэкlэ къашъом "Мыекъуапэ инэфылъэхэм" зыщыфагъасэ". Мэфэкl къэгъэлъэгъон ин Мыекъуапэ пчыхьитlурэ къыщаты. Ащ хьакlэхэр къафакlох, афэгушlох. Зэлъашlэрэ орэдыlоу Апанасэ Астемир ныбжьыкlэ дэдэу, орэд къэlоныр ригъэжьагъэу мы купым дэлажьэщтыгъ. "Мыекъуапэ инэфылъэхэр" ыцlэу орэд иl ыкlи ар концертым къыщиlуагъ.
Адыгэ Республикэм, Къэбэртэе-Бэлъкъар Республикэм ыкlи Къэрэщэе-Щэрджэс Республикэм яартист гъэшlуагъэу Быщтэкъо Азэмат "Мыекъуапэ инэфылъэхэм" ахэтыгъ, джы ямэфэкl къэгъэлъэгъонхэм ахэлажьэ.
Купэу "Мыекъуапэ инэфылъэхэм" мэфэкlым пае шlухьафтынхэр афашlыгъ. Шъуашэхэр адынхэм пае Мыекъуапэ иадминистрацие сомэ мини 100 аритыгъ. Адыгэ Республикэм ипрездентыгъэу Шъэумэн Хьазрэт мы купым ренэу ынаlэ тет ыкlи ямэфэкl пае сомэ млн 2 шlухьафтын афишlыгъ.
Купым исайт: зори-майкопа.рф
Comments
Post a Comment