Шъачэ къибыбыкlыгъэ къухьэлъатэр тыгъуасэ апэрэу Налщыч къыщытlысыгъ. Джы республикэм исхэр сыхьат имыкъукlэ Хы Шlуцlэ lушъом нэсынхэ алъэкlыщт.
Хабзэм тетэу, апэрэу къэбыбыгъэ къухьэлъатэм псыр аутхэзэ пэгъокlыгъэх ыкlи псы къэлапчъэм чlагъэкlыгъ. Авиакомпаниеу «РусЛайн» мы быбыныр зыгъэпсырэр. Зэкlэ ошъогу гъогуанэхэм атетыщтыхэ къухьэлъатэхэр кlэх. Ахэр чlыпlэ 50 телъытагъ. Такъикъ 55 гъогум тетыщтых. Шъачэ икlынхэшъ Налщыч тхьэмафэм тlорэ къухьэлъатэхэр быбыщтых - бэрэскэжъыем ыкlи шэмбэтым. Гъогупкlэм ыуасэ сомэ мини 2 къыщежьэ. Апэрэ къухьэлъатэм гъэстыныпхъэ зырагъахъом ыуж ащ лъыпытэу Шъачэ ыгъэзэжьыгъ.
Мы гъогуанэм ишlуагъэкlэ Къэбэртэе-Бэлъкъарым уикlинышъ Кавказ ихы Шlуцlэ lушъо псынкlэу ыкlи гупсэфэу унэсын плъэкlыщт.
Къухьэлъатэр Налщыч зикlыщтыр: бэрэскэжъыем - 17.50; шэмбэтым - 12:15.
Шъачэ зикlыщтыр: бэрэскэжъыем - 16:10; шэмбэтым - 10:35.
Апэрэ едзыгъомкlэ, мэкъуогъум и 2 щегъэжьагъэу lоныгъом и 29 нэс мы гъогуанэмкlэ къухьэлъатэхэр ыгъэбыбынэу авиакомпаниеу «RusLine» егъэнафэ.
Цlыфхэм ар ящыкlагъэу, рызекlохэ зыхъукIэ, гъогуанэу "Налщыч - Шъачэ" зыфиlорэмкlэ къухьэлъатэхэр зэпымыоу ыгъэбыбынхэу авиакомпанием игухэлъ.
Comments
Post a Comment