Джэджэ ыкlи Мыекъопэ районхэм псыкъиунэу къащыхъугъэм идэгъэзыжьын республикэм илlышъхьэу Къумпlыл Мурат лъэплъэ
Адыгеим илlышъхьэу Къумпlыл Мурат мы лъэхъаным Санкт-Петербург щыl, экономикэмкlэ дунэе форумэу ащ щыкlорэм хэлажьэ.
Блэкlыгъэ чэщ-зымафэм ощхэу къещхыгъэхэм зэрарэу къахьыгъэм республикэ пащэр щагъэгъозагъ. Джэджэ ыкlи Мыекъопэ районхэм псыр къащиугъ. Ощхышхохэм апкъ къикlэу псэупlищмэ адэжь псыхъохэр янэпкъыхэм къадэкlыгъэх. Джырэкlэ псыр lэгу 54 адэхьагъ, унэ 12 арыхьагъ.
Цlыфхэм якъэухъумэн ыкlи псыкъиуным зэрарэу къыхьыгъэм идэгъэзыжьын Къумпlыл Мурат телефонкlэ лъэплъэ. Ащ иунашъокlэ республикэм ипремьер-министрэу Геннадий Митрофановыр псыр къызщиугъэм щыlагъ.
Псыр зыкlэхьэгъэ псэупlэхэм къэгъэнэжьакlоу 70 ыкlи техникэу 21 ащэлажьэ. Псыхъоу Фарзэ телъ лъэмыдж чlэгъхэм яукъэбзын купищ ыуж ит. Ащ нэмыкlэу псыкъиуным изэрар къалъытэным пае нэмыкl купхэм унэхэр къакlухьэх. Псыхъохэм язытет зэпымыоу лъэплъэх.
«Мы уахътэм ехъулlэу зэкlэри зыпкъ ит ыкlи щынагъо щыlэп. lофыхэм язытет сылъэплъэ. Ом изытет ыпкъ къикlэу имылъкукlэ зэрар зиlэ хъугъэхэм ищыкlэгъэ lэпыlэгъу щэч хэмылъэу агъотыщт", - къыlуагъ Адыгеим илlышъхьэу Къумпlыл Мурат.
Comments
Post a Comment