Экономикэмкlэ форумэу Санкт-Петербург щыlагъэм илъэхъан Адыгеим илlышъхьэрэ SFT Group ипащэхэмрэ мы проектхэм ягъэцэкlэн тегущыIагъэх.
SFT Group ипащэхэм ясовет итхьэматэу Анатолием Штейнберг республикэм илlышъхьэу Къумпlыл Мурат lукlагъ.
Илъэсым къыкlоцl тхылъыпlэ тонн мин 250 щегъэжьагъэу 300 нэс къыдэзгъэкlыщт хъызмэт Мыекъуапэ щашlынэу апэрэ проектымкlэ ягухэлъ. Ащ пае чlыпlэр зэрагъэгъотыгъах ыкlи бизнес-план ашlы. Мы хъызмэтым игъэпсын сомэ млрд 15 инвесторым хилъхьащт ыкlи lофшlэпlэ чlыпlэу 120 ыгъэпсыщт.
Ятlонэрэ проектыр гофротхылъыпlэ къэмланхэм яшlын телъытагъ. Тэхъутэмыкъуае районым щагъэнэфагъэ промышленнэ паркым ичlыпlэ агъэфедэн зэралъэкlыщтыр инвесторхэм Къумпlыл Мурат ариlуагъ. Мыщ халъхьащтыр сомэ млрд 5 мэхъу ыкlи нэбгырэ 280 lоф щашlэн алъэкlыщт.
Зааодхэр щашlынхэм пае Адыгеир къызкlыхахыгъэр инвесторым къыlуагъ. Ащыгъум шъолъырым щызэрахьэрэ политикэри, чlыпlэу зыдэщыlэри, екlолlапlэу иlэхэри къыдалъытагъэх.
Comments
Post a Comment