Фото: culture.ru
Лъэпкъ къашъомкlэ Адыгэ Республикэм икъэралыгъо академическэ ансамблэу "Налмэс" щызэхащагъэр илъэс 85 хъугъэ
"Налмэсыр" дунаим анахь щыцlэрыlо адыгэ ансамблхэм ащыщ. Ыкlи ыныбжь илъэс 85 нэсыгъ. 1936 илъэсым мэкъуогъум и 18 Адэгэ хэкум ипащэхэм яунашъокlэ орэдым ыкlи къашъом яансамбль Мыекъуапэ щызэхащэгъагъ. Ащ иапэрэ пэщагъэх Бэджэшъэ Абул ыкlи Кубэ Щэбан. Иапэрэ артистхэм ащыщыгъэх Кlыкl Зулхьаджэ, Бэшкэкъо Сахьид, Темзэкъо Ибрагим.
Зы унагъом щыщхэр лlэужхэр зэкlэлъыкlохэу "Налмэсым" хэхьанхэу, къыщышъонхэу хабзэ хъугъэ. Къулэхэр, Нэмытlэкъохэр, Хъоджаехэр лlэужхэм зызэблахъузэ "Налмэсым" къыщэшъох.
1996 илъэсым Адыгеим икультурэ имафэхэр Москва щыкlуагъэх, "Налмэсыр" ащ хэлэжьагъ ыкlи мы къэгъэлъэгъонхэм ауж "академическэ" цlэр афагъэшъошагъ.
Лъэпкъым икультурэ лъагэу ыlэтэу "Налмэсыр" илъэс 85 хъугъэу къашъо.
Comments
Post a Comment