Полицием иlофышlагъэу Игорь Ляховец
"Медуза" ижурналистэу Иван Голуновым наркотикхэр кlэкlэзыдзагъэхэ полицием иlофышlагъэхэр Москва къэлэ хьыкумым ихьыкумашlэу Сергей Груздевым ыумысыгъэх. Москва икъохьэпlэ шъолъыр Хэгъэгу кlоцl lофхэмкlэ игъэlорышlапlэу щыlэм наркотикхэм ягъэзекlон лъыплъэгъэнымкlэ икъутамэ ипащэ игуадзэщтыгъэу Игорь Ляховец хьапсэу илъэс 12 тыралъхьагъ. Ащ епхыгъэу lоф зышlэщтыгъэхэ Акбар Сергалиевым, Роман Феофановым ыкlи Максим Уметбаевым япщыныжь илъэси 8 мэхъу нэбгырэ пэпчъ. Илажьэ еуцолlэжьыгъэ Денис Коноваловым пшъэдэкlыжьэу фагъэнэфагъэр хьапс илъэситф, къыlопщыгъ хьыкумым пресс-къулыкъу.
"Медуза" ижурналистэу Иван Голунов
Аумысыхэрэм къатынэу мылъкоу Голуновыр зыкlэдэугъэри хьыкумым игъоу ылъытагъ. Иван Голуновым ифедэу нэбгырэ пэпсъ сомэ 1 млн зырыз рагъэтыщт. Полицием иlофышlэхэм къулыкъуцlэу яlагъэхэр аlахыжьыгъэх. Илъэс 1,5 щыублагъэу 5 нэсэу къэралыгъо lэнатlэхэр агъэцэкlэнхэ фитыщтыхэп.
Шъугу къэдгъэкlыжьын, Ляховец илъэс 16, Сергалиевым, Феофановым ыкlи Уметбаевым илъэс 12 зырыз, Коноваловым илъэси 7 хьапс атыралъхьанэу прокуратурэр кlэдэущтыгъ.
Уголовнэ lофхэм язэхэфынкlэ пчъагъэхэр нахьышlу шlыгъэнхэм пае 2019 илъэсым имэкъуогъу мазэ и 6 полицием къулыкъум щызыхьыщтыгъэ нэбгыритфым журналистэу Иван Голуновым наркотикхэр кlэкlадзагъэх. Ащ иунэ хэбзэнчъэ наркотикхэр къызырагъуатэхэм ахэр къыкlэкlадзагъэхэу зэриlорэм текlыгъэп. Журналистыр заубытым цlыфхэм даохэр ашlыгъэх, бэ темышIэу къатlупщыжьи, иlоф зэфашlыжьыгъ. Полицием иlофышlэхэу Голуновыр зыубытыгъагъэхэр бэрэ пэмылъэу агъэтlысыгъэх.
Comments
Post a Comment