Адыгэ Республикэм инароднэ тхакIоу, Адыгэ Республикэмрэ Урысые Федерациемрэ культурэмкIэ язаслуженнэ IофышIэу, Урысыем итхакIохэм я Союз 1977-рэ илъэсым къыщегъэжьагъэу хэтыгъэ Пэнэшъу Сэфэр Иляс ыкъом ыныбжь илъэс 91-м итэу 2021-рэ илъэсым гъэтхапэм и 6-м идунай ыхъожьыгъ.
Адыгэ автоном хэкумкIэ Теуцожь районым хахьэщтыгъэ къуаджэу Къэзэныкъуае 1930-рэ илъэсым чъэпыогъум и 29-м ар къыщыхъугъ. Пшызэ мэкъумэщ институтым иагрономическэ факультет 1957-рэ илъэсым къыухыгъ. 1957 – 1959-рэ илъэсхэм агрономэу Iоф ышIагъ. 1959-рэ илъэсым къыщегъэжьагъэу гъэзетэу «Социалистическэ Адыгеим» иредакцие собкорэу, мэкъу-мэщымкIэ иотдел ипащэу, редактор шъхьаIэм иапэрэ гуадзэу щылэжьагъ.
КIэлэцIыкIухэм апае къыдагъэкIырэ республикэ журналэу «Жъогъобыным» 1998-рэ илъэсым къыщегъэжьагъэу иредакторыгъ.
Пэнэшъу Сэфэр романхэу «Шъоу дыдж», «Бэджэхъ», «Мэлышъо зытелъэшъогъэ тыгъужъ», «УIэгъэжъ», «Хым ишъхьал мэхьаджэ е Неущ кIасэ хъущт», «МыкIыжьын гу уIагъ», повестхэу «УшэтыпI», «ШIулъэгъур нахь лъэш», «Псы къаргъом ычIэгъ» зыфиIохэрэр ыкIи нэмыкIхэр къыдигъэкIыгъэх.
Икъоджэ гупсэ фэгъэхьыгъэ документальнэ повестэу «Был такой аул Казанукай» зыфиIорэр 2005-рэ илъэсым Мыекъуапэ къыщытырадзагъ. Иповестэу «Шъэоекъо зэшхэр» зыфиIорэм техыгъэу кIэлэцIыкIухэм апае урысыбзэкIэ спектаклэ Адыгэ драмтеатрэм ыгъэуцугъ. Пэнэшъу Сэфэр итхыгъэхэм ащыщхэр журналхэу «Кубань», «Дон», «Крокодил» зыфиIохэрэм, гъэзетэу «Литературная Россия» къащыхаутыгъэх.
1990-рэ илъэсым иповестэу «Псы къаргъом ычIэгъ» зыфиIорэм пае народнэ тхакIом Теуцожь Цыгъо ыцIэкIэ щыт шIухьафтыныр къыратыгъ. С. И. Пэнэшъум медалэу «Адыгеим и Щытхъузехь» зыфиIорэр къыфагъэшъошагъ.
Пэнэшъу Сэфэр Иляс ыкъом иунагъорэ иIахьылхэмрэ тафэтхьаусыхэ, шIукIэ ренэу ежь тыгу илъыщт.
А. А. Шъхьэлахъу, И. Ш. МэщбашI, Е. И. Салов, Ш. И. Къуикъу, Р. Хь. Мамый, А. С. Пренко, Т. И. Дэрбэ, Щ. Е. ЩашIэ, О. В. Селедцов, Хъ. Хь. Хъурмэ, С. А. ГутIэ
Comments
Post a Comment