Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем зэпахырэ узэу коронавирусым республикэмс зызэрэщиушъомбгъугъэм изытет, къэбарэу къекIокIыхэрэм ыкIи врачэу а узыр къызпыхьагъэхэм ипсауныгъэ изытет афэгъэхьыгъэу къэгущыIагъ.
Адыгэ республикэмкIэ мы уахътэм ехъулIэу коронавирусыр зиIэу къагъэшъыпкъэжьыгъэр нэбгырэ 20. Зэпахырэ узхэм зыщяIэзэхэрэ республикэ сымэджэщым нэбгырэ 33-рэ чIэлъ.
Сымэджэ хьылъэ мыхэм ахэтэп, ищыкIэгъэ Iэзэгъур арагъэгъоты. Непэ анахь сымэджэ хьылъэу тиIэр тиIофшIэгъу врачэу Адыгэ республикэ клиническэ сымэджэщым пульмонологиемкIэ иотделение чIэлъыр ары. Апэ тхьабыл плъыр-стыр узыр иIэу ар отделением къащагъ. Нэужым рагъэшIыгъэ медицинэ уплъэкIунхэм къызэрагъэлъэгъуагъэмкIэ, «Covid-19-р» иIэу къычIэкIыгъ. Мы уахътэм мы отделением щеIазэх, ежьыри, кIэрыхьанэу хъугъэ цIыфхэри шъхьафы ашIыгъэх. Сымаджэм ипсауныгъэ изытет зыпкъ итэу хьылъэ, зэрифэшъуашэу щыIэ шапхъэхэмкIэ еIазэх, хъужьынэу тыщэгугъы.
Пульмонологием сымаджэу къеуалIэхэрэр джы Мыекъопэ къэлэ сымэджэщым къащафагъэхьазырыгъэ отделением агъакIох, зищыкIэгъэ пстэуми IэпыIэгъу арагъэгъотыщт. Мэфэ 14-кIэ Адыгэ республикэ сымэджэщым пульмонологиемкIэ иотделение къызэIуахыжьыщт.
Къэбар зэфэшъхьафхэу Интернетым, социальнэ хъытыухэм къащекIокIыхэрэм алъэныкъокIэ къасIомэ сшIоигъу ахэм тиIофшIэн иягъэ къызэрекIырэр.
КъызгурэIо цIыфхэр непэ зыхэтхэ бырсыр гумэкIыгъом зэригъэгубжыхэрэр. Ахэр икъоу зэхэтфынхэу хъурэп.
Непэ анахьэу тиIофшIэн зыфэгъэзагъэр сымаджэхэм япчъагъэ зыхахъокIэ, тимедицинэ кIочIэгъу фэхъуным фытегъэпсыхьэгъэ IофшIэнхэр зехьэгъэнхэр ары. Врачхэу зыгъэпсэфыгъом щыIэхэр къыдэтэщыжьых, унэе шIыкIэм тетэу Iазэхэрэр къыхэдгъэлэжьэнхэу тэгъэхьазырых, етэгъаджэх. Оборудованиехэр етIупщыгъэу къызIэкIэтэгъахьэх, зыгорэкIэ узым зиушъомбгъумэ, сымаджэхэр зыдэтщэщт чIыпIэхэр тэгъэхьазырых, - къыIуагъ министрэм.
Адыгэ Республикэм ипресс къулыкъу