КъумпIыл Мурат цIыфхэм афэгъэзэгъэ видео джэпсалъэу джырэблагъэ къышIыгъэм коронавирусыр зэрэзэпахырэр къэгъэуцугъэным, республикэм исхэм япсауныгъэ къэухъумэгъэным тапэкIэ къыдигъэкIыгъэ унашъор зэрэфэгъэхьыгъэр, шапхъэхэр гъэлъэшыгъэным нэмыкI хэкIыпIэ мы лъэныкъомкIэ зэрэщымыIагъэр къыщыхигъэщыгъ.
— Зэпахырэ узым зимыушъомбгъуным пае шапхъэхэр гъэцэкIэгъэнхэм мэхьанэшхо зэриIэр зэкIэми къыдгурыIон фае, — къыIуагъ ащ. — Зы нэбгырэм къеуалIэмэ нэбгыри 10-мэ аритын ылъэкIыщт, игъом вирусыр къыхамыгъэщымэ, 100-м нэсэу пахыным ищынагъо щыI. Ары шапхъэхэр къэдгъэпхъэшэнхэм ушъхьагъу шъхьаIэу фэхъугъэр. Илъэс 65-м зыныбжь ехъугъэхэр яунэхэм арысынхэр шIокI зимыIэ Iоф. Сыда пIомэ, ахэм коронавирусыр къяуалIэмэ иягъэу аригъэкIыщтыр нахьыб, медицинэм иучреждениехэр афыримыкъунхэкIи щынагъо.
ЦIыфхэм Iофым хэлъ пстэур икъоу алъыгъэIэсыгъэным министерствэхэри, муниципальнэ образованиехэри нахь чанэу ыуж итынхэу АР-м и ЛIышъхьэ къафигъэпытагъ.
Роспотребнадзорым АР-мкIэ и ГъэIорышIапIэ къызэритырэмкIэ, коронавирусыр къяолIагъэу зэгуцафэхэрэр нэбгырэ 15 мэхъу, 14-мэ къызэряолIагъэр Москва къыушыхьатыгъ. Сымаджэхэм хьылъэдэдэ ахэтэп, зы нэбгырэ адрэхэм анахь хьылъ, ау ащи ипсауныгъэ нахьышIу мэхъу.
Адыгэ Республикэм ипресс къулыкъу
Comments
Post a Comment