Къэбэрдей-Балъкъэр Республикэм коронавирус уз зэрыцIалэр къыщымыгъэхъунымрэ абы зэрызиубгъум щыкIэлъыплъынымкIэ оперативнэ штабым и япэ зэIущIэм республикэм и Iэтащхьэ КIуэкIуэ Казбек щыжиIащ: «Иджыпсту уз зэрыцIалэр къэмыгъэхъуным хуэунэтIа лэжьыгъэхэр тэмэму йокIуэкI икIи гужьеигъуэ щыIэкъым. Апхуэдэу щыт пэтми, дэ дытеплъэкъукI хъунукъым ди республикэм и цIыхухэр а узым щыхъумэнымкIэ зэфIагъэкIхэм. Иджыпсту зэтеува щытыкIэр къилъытэу, оперативнэ штабым зэщIэгъэуIуауэ, зэгурыIуэу, жану лэжьэну и къалэнщ».
Уз зэрыцIалэм зыщыхъумэнымкIэ штабым хагъэхьащ КъБР-м и Правительствэм социальнэ IэнатIэхэм пэрыт и лэжьакIуэхэр, кIэлъыплъакIуэ, хабзэхъумэ органхэм я унафэщIхэр. Абыхэм ящыщу зэIущIэм къыщыпсэлъахэу Роспотребнадзорым и унафэщI Пагуэ Жыраслъэнрэ КъБР-м узыншагъэр хъумэнымкIэ и министр Къалэбатэ Рустамрэ зэрыжаIамкIэ, республикэм щыщу зыми коронавирус уз зэрыцIалэр къеуэлIакъым, ауэ апхуэдэ сымаджэхэр къыкъуэкIмэ, медицинэ IуэхущIапIэхэр абыхэм зэреIэзэнум хуэхьэзырщ.
ЗэIущIэм щыжаIахэм япкъ иткIэ унафэ зыбжанэ къащтащ. Адэ-анэхэр мы Iуэхум зэрытегузэвыхьым къыхэкIыу гъатхэпэм и 17-м щегъэжьауэ курыт еджапIэхэмрэ сабий садхэмрэ цIыкIухэр мыкIуэми хъуну ягъэуващ. Апхуэдэу социальнэ IуэхущIапIэхэм (интернатхэм, цIыхухэм я узыншагъэр щызэтрагъэувэж центрхэм) щыIэхэм лъыгъуэзэн папщIэ кIэлъыкIуэхэр нэхъ мащIэ ящIынущ.
Оперативнэ штабым гъэзэщIакIуэ властым и органхэмрэ жылагъуэ зэгухьэныгъэхэмрэ чэнджэщ ярет цIыху куэд къызрихьэлIэ зэхыхьэхэр, спорт, щэнхабзэ, зэштегъэу Iуэхухэр зэкIэ ирамыгъэкIуэкIыну.
Коронавирус уз зэрыцIалэм пыщIа сыт хуэдэ Iуэхуми теухуауэ цIыхухэр оперативнэ штабым псалъэ хъунущ мы телефонхэмкIэ: (8662) 40-15-65, 42-26-78.
adyghepsale.ru
Comments
Post a Comment