Къэбэртае-Бэлкъарым щыщ Адыгэ лъэпкъ-Iофлэжьхэр полицием къигъэуцугъэх

on

Гъэтхапэм и 12-м, Къэбэртае-Балкъар Республикэм щыщ Адыгэ лъэпкъ-Iофлэжьхэу Шорман Азаматрэ ЩашIэ Алекрэ Урысые Федерацием икноституцие зэхъокIыныгъэхэр зэрэфашIырэм дырамыгъащтэу зыцIыф закъо зыхэлажьэрэ мырэзэныгъэ зэхахьэ зырыз зырызэу Налщыч щашIыгъ. Джащ фэдэу фейсбукум къыщатхы.

Адыгэ лъэпкъ-Iофлэжьхэр зыдэIутыгъэ чIыпIэм полициехэр къыIухьи ахэр Iуащхи полицием иунэ ащагъэх упчIэхэр къышъотыщт аIуи.

Джыдэдэм ахэм юрист аригъусэу полицием иунэ щыIэх ау телефонхэр яIыгъэх ыкIи къэгущыIэнхэ алъэкIы.

КъызэраIуагъэмкIэ неущ, гъэтхапэм и 13-м, суд ашIыщтых ыкIи къагъэуцугъэхэр нычъхьапэ яунэмэ агъэкIожьыщтых.

КъэIогъэн фае, Урысые Федерацием изаконкIэ зы цIыф закъо зыхэлажьэрэ мырэзэныгъэ зэхахьэ хэти ышIын фит зыми емыупчIыжьэу. Ау, мары полициехэм зэконыр къызэрэрамыдзэрэр мы хъугъэ шIагъэм къегъэлъагъо.





Comments

Post a Comment