Адыгабзэм, адыгэ тхэн-еджэным афэгъэхьыгъэу Адыгэ Республикэм Iофтхьабзэу щырекIокIырэр бэ. Ахэм ахэлажьэхэрэм адыгабзэм изэгъэшIэн фэгъэхьыгъэу Iофыгъуабэ къыхагъэщы.
Ахэм ащыщых амалэу щыIэхэр икъоу зэрамыгъэфедэхэрэр, адыгэ унагъохэм, адыгабзэкIэ зэращымыгущыIэхэрэр, сыхьат пчъагъэу адыгабзэм изэгъэшIэн тырагъэкIуадэрэм илъэс къэс къызэрэщагъакIэрэр, общественнэ-политическэ пшъэрылъэу адыгабзэм ратырэм хахъо зэримышIырэр, адыгэ литературэр адыгабзэкIэ зэрамыгъашIэу урысыбзэкIэ зэрэзэблахъугъэр, Адыгэ Республикэм и Конституцие адыгабзэм фэгъэхьыгъэу итхэгъэ унашъохэр зэрамыгъэцакIэхэрэр, нэмыкIхэри.
Мы зигугъу къэтшIыгъэхэм цIыфхэр зыкIагъэгумэкIхэрэр адыгабзэр мыкIодыжьыным пай, бзэр кIодымэ, лъэпкъыр зэрэкIодырэр зэкIэми къагурыIоным пай. Бзэр лъэпкъ пэпчъ Тхьэм къыхилъхьагъ. Тын лъапIэу тэ, адыгэхэм, къытхалъхьэгъэ бзэ дахэм зэкIэми тишъыпкъэу тырыжъугъэлажь тилъэпкъэу илъэсишъэ пчъагъэхэм тятэжъхэм апсэ зыфагъэтIылъыгъэр тэшъумыгъэгъэкIодэу хахъо фэтэжъугъэшI. Тэ шIу тлъэгъурэ адыгабзэм икъэгъэнэжьынкIи ихэгъэхъонкIи къэралыгъори къыдгоуцощт. Къэралыгъо унашъокIэ адыгабзэр урысыбзэм кIыгъоу ти Адыгэ Республикэ къэралыгъуабзэу зыщагъэуцугъэкIэ, а къэралыгъор ащ икъэгъэнэнкIи зышъхьасын щыIэп, ишIуагъэ къызэригъэкIощтым пылъыщт. Къэралыгъо IофышIэхэми, шIэныгъэлэжьхэми, кIэлэегъаджэхэми, цIыф къызэрыкIохэми тIэ зэкIэдзагъэу тиадыгабзэ ихэхъоныгъэ тишъыпкъэу тыфэлажьэмэ, адыгабзэр кIодыщтэп.
Адыгабзэм изэгъэшIэнкIи, ар шIу алъэгъунымкIи амалэу щыIэр зэкIэри гъэфедэгъэн фае. Адыгэ къэралыгъуабзэм имэхьанэ къэIэтыгъэным, ащ ихэхъоныгъэрэ ихэхъо-хэкIынрэ алъыплъэн къэралыгъо орган (IофшIапIэ) зэхэщэгъэн фае, гъэсэныгъэмрэ шIэныгъэмрэкIэ Министерствэм изакъоу а Iофыр фэмыгъэзагъэу, еджапIэхэмрэ унагъохэмрэ язэпхыныгъэ нахь гъэлъэшыгъэн фае. Къалэмэ ащыпсэурэ адыгэ еджакIохэм языгъэпсэфыгъо мазэхэр адыгэ чылагъохэм ащагъакIоу гъэпсыгъэмэ, адыгабзэр ашIэнымкIэ ишIуагъэ къэкIощт.
Лъэпкъыбзэр къэралыгъуабзэ пшIыным бэдэд ищыкIагъэр: литературабзэр гъэпсыгъэн, псыхьэгъэн, къэралыгъо терминыбэ ащ хэгъэхьэгъэн, ахэр тхылъы шIыгъэу къыдэгъэкIыгъэнхэ, ащ пылъыщт шIэныгъэлэжьхэр, къэралыгъо IофышIэ-
хэр къыхэхыгъэнхэ, а пстэумэ апэIухьащт ахъщэр бюджетым къыщыдэлъытэгъэн фае.
Адыгэбзэ урокхэр мэкIэ дэдэ ашIыгъэх. Ащ къегъэлъагъо адыгабзэр къэралыгъуабзэ пшIыным мылъку зэрищыкIагъэр. Аужыпкъэм адыгэбзэ-къэралыгъуабзэр ти ЛIышъхьэ ымышIэми хъунэу зыIохэрэр къыхэкIых. Республикэ къэхъугъакIэм IэпыIэгъушхо ищыкIагъ. ЩымыIэм адыгабзэр дэкъацэм декъузэ. Ау адыгэ лъэпкъым ыбзи, ихабзэхэри, итарихъи, икультури ищыкIагъэх, арышъ, ахэм игъэкIотынэу тапылъыныр типшъэрылъ. Анахь гухэкIыр къэралыгъуабзэкIэ тызэджэрэ бзэм лъыплъэн орган зэрэщымыIэр ары. ГъэсэныгъэмкIэ Министерствэм изакъоу а Iофыр фызэшIокIыщтэп. Инспекторэу предмет пэпчъ иIагъэхэр иIэжьхэп. Адыгэ Парламентым — Хасэм икомитет а Iофым ыуж итын фае, ау зы нэбгырэ-нэбгыритIукIэ, ахэми ясэнэхьаткIэ къемыкIухэу, сыд ашIэн алъэкIын. Республикэм и ЛIышъхьэ епхыгъэу адыгабзэмкIэ Совет зэхэщагъэу тиI, ащ хэтхэм янахьыбэм адыгабзэм иIофыгъохэр ашIэхэрэп, пшъэдэкIыжь зыхьыни, пIопэн хъу-
мэ, ахэтэп. Къэралыгъуабзэм иIофхэр бгъэцэкIэнхэм ахъщэшхо ищыкIагъ, ау тэ тызыфаер ахъщэ хэтымылъхьэу тыбзэ къэралыгъуабзэ тшIыныр ары. Бзэм щыкIагъэу иIэхэр дэгъэзыжьыгъэнхэм пае бюджетым статья шъхьафэу ащ пэIухьащт ахъщэр хэгъэуцогъэн фае. Тэ непэ ащ фэдэ тиIэп, ары тиIофхэри зыкIылъымыкIуатэхэрэр.
Сыд фэдэрэ бзи къэралыгъо пшъэрылъхэр зыфэпшIыхэкIэ, ащ ехьылIагъэу программэ псау зэхэбгъэуцон фае, щыIэныгъэм ыбгъу пстэухэри къыдилъытэхэу. Сыд фэдэрэ Iоф пштагъэми, къэралыгъо екIолIакIэ щыIэн фае нахь, «къызэрэхъу имэщ» пIоу упымылъмэ хъущтэп. ПсынкIагъоп лъэпкъыбзэр къэралыгъуабзэ пшIыныр. ЫбгъукIэ угот къодыеу укъеплъымэ, бзэр хьазырэу щыIэу, узыфэе пшъэрылъхэр ежь-ежьырэу ыгъэцэкIэнхэу, узыфаем псынкIэу дэпIонтIэхынэу къыпщыхъущт, ау ар ащ тетэп. Къэралыгъо документхэр адыгабзэкIэ птхынхэу е къэралыгъо Iофхэм уакъытегущыIэнэу зебгъажьэкIэ, ар псынкIэу къыбгурэIо. Къэралыгъуабзэри бгъэпсын — тхылъыбзэр зыпкъ игъэуцогъэн, гущыIэ зэгъусэ-зэхэлъхэр екIоу къэгъотыгъэнхэ, цIыфхэм ягъэштэгъэнхэ фае, лъэпкъыбзэм хэмыт къэралыгъо терминыбэ ащ хэгъэхьэгъэн, терминхэр зыдэт гущыIалъэ зэхэгъэуцогъэн, къыдэгъэкIыгъэн фае. Ахэм мылъкоу апэIухьащтыр хэбзэ IофкIэ штэгъэн фае.
Сыхьат зытIущэу тхьамэфэ псаум адыгабзэм тырагъэкIуадэрэм къыхэкIыкIэ адыгабзэр еджапIэхэм щамышIэжьы хъугъэ. КIэлэцIыкIумэ апае адыгабзэкIэ «жъогъобыныр» къыдагъэкIы, ар дэгъу, ау радиоми, телевидениеми адыгэ унагъо-
хэм сабыйхэр зэряIэр ащыгъупшэжьыгъэм фэд. КIэлэцIыкIухэм апае къэтынхэр мэ-
кIэ дэдэх, щыIахэп пIоми хъун.
Непэ къэралыгъо Iофхэр зезыхьэхэрэр зытекIыхэкIэ, неущ а пшъэрылъхэр зыгъэцэкIэщтхэр джа къыткIэхъухьэрэ цIыкIухэр ары. Непэ умышхагъэми, неущ узышхэжькIэ зыогъэшхэкIыжьы, ау ащ фэдэп бзэм изэгъэшIэн. Непэ блэбгъэкIырэр зэгъэшIэжьыгъуае хъущт. Адыгабзэр зэрагъэшIэн аIомэ джы амалыбэхэр тиIэ хъугъэх: узэджэщтыр бэдэдэу тиI, адыгабзэкIэ узыдэгущыIэщтыр, узыщыгугъыщтыр къытэгъэуцокIыгъ, упчIэжьэгъу пшIыщт цIыф еджэгъэшхохэр тиIэх — а зэпстэумэ уасэ афэпшIын, уарыгушхон фае.
Ау адыгабзэ зышIэрэ пстэуми адыгабзэр, бзэ хабзэхэр ашIэх пIоныр къекIурэп. Бэмэ къагурыIорэп дунаим цIыфыр къызытехъом ныдэлъфыбзэу къыхилъхьагъэм зэхъокIыныгъэхэр зэрэфэхъунхэ ылъэкIыщтыр, нэмыкI цIыф лъэпкъхэу зыхэтым абзэ къыхэкIэу. ГущыIэм пае, Тыркуем щыпсэурэ адыгэхэм абзэ тырку гущыIэхэр къыхэуцох, Урысыем щыпсэурэ адыгэхэм яадыгабзэ урысыбзэм къыхэкIыгъэ гущыIэхэр щагъэфедэх. Ащ къикIырэп адыгабзэр кIодэу. Ащ къыгъэлъагъорэр адыгэхэм зыдэлэжьэрэ, зыдэпсэурэ лъэпкъхэм абзэ щыщ гущыIэхэр агъэфедэхэу ары. Анахь шъхьаIэр адыгэу а зы къэралыгъо кIоцIым щыпсэухэрэр зэгурыIохэмэ ары. А гущыIэ зырызхэу нэмыкIыбзэмэ къахэкIыгъэхэм ямэхьанэ нэмыкI къэралыгъо щыпсэурэ адыгэхэм амышIэу хъуми, гущыIэухыгъэм ащ имэхьани къыуегъэшIэжьы, арышъ, «адыгабзэм адыгэбзэ гущыIэ нэмыкI хэрэмыт» пIоныр тэрэзэп. Бзэ щыIэп нэмыкIыбзэм къыхэкIыгъэ гущыIэ хэмытэу. «Адыгэбзэ гущыIэ нэмыкI хэмытэу адыгабзэ зэхэжъугъэуцуи адыгэ лъэпкъ пстэоу щыIэм апашъхьэ къишъулъхь» пIоныр бзэшIэныгъэм ыштэн ылъэкIырэп. Сыда пIомэ ащ фэдэ щыIэп. Сыд фэдэрэ гущыIи нэмыкIыбзэм къыхэкIэу адыгабзэм къызыхахьэкIэ ежь ыбзэ шъуашэ щелъэшъ, ежь щыщым фэдэу мэхъужьы. Ар къызыгурымыIохэрэм е зымышIэхэрэм, бзэм ехьылIэгъэ Iоф горэм утегущыIэ хъумэ, укъызэпаутэу къыхэкIы, укъагъэсэжьэу гущыIэ гуаохэр къадзых. Мыщ фэдэхэм ахэхьэх адыгэ лъэпкъхэм якъэIокIэ зэфэшъхьафхэм яхьылIэгъэ Iофыгъохэри. Мыхэр къызкIыхэзгъахьэхэрэр, ахэри тхылъыбзэм, къэралыгъуабзэм епхыгъэхэшъ ары.
ЗэкIэми зэрэтшIэу, абдзахи, бжъэдыгъуи, бэслъынэйи, къэбэртайи, кIэмгуйи, шапсыгъи — адыгэх. Ар дэгъу. Ахэм ащыщ горэм «сыадыг» ыIомэ зи мыхъун хэлъэп, ау «сыадыгэп» ыIомэ гукъао хъущт, емыкIу ыкIи. Ау бэрэ зэхэтэхы: «Сыд лъэпкъ зэхэдза ышIырэр! ЩыIэп абдзахи, бжъэдыгъуи, бэслъынэйи, нэмыкIхэри. ЗэкIэми — тыадыг, адрэхэр щыIэхэп», ягугъуи къэпшIэу адэрэп. Ащ фэдэу зыIорэр ащ фэенкIи мэхъу шъхьаем, сыдэу пшIына, а лъэпкъхэр (этносхэр) адыгэмэ яIагъэх, яIэх, джыри бэрэ яIэщтых — ар аущтэу дунаим къыгъэпсыгъ.
Зы цIыф лъэпкъыр чIыпIэ лъэпкъ-лъэпкъэу зэтеутыгъэным фэмыехэм къагурымыIокIэ енэгуягъо а чIыпIэ лъэпкъ зэфэшъхьафхэр зы лъэпкъ шъхьаIэм (адыгабзэм) лъапсэу зэриIэхэр. Чъыгым зэрэщытэу «чъыгы» раIо, ау ащ лъапси, шъхьапи, къутами, тхьапи иIэх. Джащ фэд лъэпкъыри. Лъапсэу, псынэкIэчъэу лъэпкъым иIэхэр щыбгъэзыехэмэ, лъэпкъыр гъонлэщт, гъущт, етIанэ кIодыжьыщт. Ар аущтэу тшIыныр тэрэзэп, гунахь, дунаим къызэригъэпсыгъэм пэшIуекIо. Ау а чIыпIэ зэлъэпкъэгъухэр яшэнкIи, яхабзэкIи, абзэкIи зэгурыIонхэ фае. Яшэн-хабзэхэр тIэкIу зэтекIхэми, ащ фэдизэу къыхэщырэп, изэрари къакIорэп зэгурыIонхэмкIэ. Ау бзэр тIэкIу зэтекIы хъумэ, зэгурыIонымкIэ изэрар къэкIон ылъэкIыщт, къэкIо ыкIи.
А зы лъэпкъым щыщхэр зэгурыIонхэм пае гъэсэныгъэ зэикI а лъэпкъыбзэмкIэ агъотын фае; къэралыгъо пшъэрылъхэр бзэм зэрихьанхэм пае чIыпIэ лъэпкъыбзэмэ къахэхыгъэу, зэдаштагъэу зы лъэпкъыбзэ агъэнафэ. Ащ фэдэ бзэ шъхьаIэм зэреджэхэрэр — литературабз. Адыгэхэм джыдэдэм тиIоф зытетымкIэ, литературэ бзитIу тиIэ хъугъэ: адыгэ (кIэхэ) литературабзэр ыкIи къэбэртэе-щэрджэс (шъхьагъ) литературабзэр. А литературэ бзитIоу зылъэ теуцуагъэхэу, шапхъэу яIэхэр шIэныгъэлэжьхэм къагъэнафэхи, цIыфхэм зэдаштагъэхэр ары еджакIохэм яшIэныгъэ уасэ зэраратырэри, цIыф гъэсагъэхэм якъэгущыIакIэ лъытэныгъэ фязыгъэшIырэри, къэралыгъуабзэ хъун зылъэкIыщтыри. Iофым а лъэныкъомкIэ тыкъекIуалIэмэ, тиадыгэ литературабзэ (къэралыгъуабзэ) дэгъоу, къабзэу зэкIэми агъэфедэу тIоным пэчыжь.
Тиадыгабзэ къэралыгъуабзэ хъуным пае тилитературабзэ IэубытыпIэ шIыгъэн фае. Адыгэ къулыкъушIэу (интеллигенциеу) зызылъытэжьрэм литературабзэр ышIэныр ипшъэрылъ. Адыгабзэр къэралыгъуабзэ хъунымкIэ шIэныгъэлэжьхэм рахъухьагъэмэ ягъэпсын пэIухьащт ахъщэр амал зэриIэкIэ Адыгэ Республикэм къыгъотын фае. ЗэкIэми къагурыIон фае: ежь Адыгэ Республикэр щызыгъаIэрэри адыгабзэр ары, адыгэ лъэпкъ цIыкIоу а бзэр зыпсыхьэрэр, зезыхьэрэр ары. Арышъ, тифилологхэу адыгабзэр, адыгэ IорыIуатэр, адыгэ литературэр дунаим щязыгъэшIагъэмэ афэдэу, зэкIэми тиакъыли, тиамалхэри, тизэшIокIхэри зэхэтэжъугъалъхьи адыгабзэм ифэшъошэ уасэ фэтэжъугъэшI, адыгэ къэралыгъуабзэм имэхьанэ къэтэжъугъэIэт.
Гъыщ Нухь
Филологие шIэныгъэхэмкIэ доктор
Comments
Post a Comment