Адыгэ Республикэм и Къэралыгъо филармоние ичIэхьапIэ къыщызэIуахыгъэ къэгъэлъэгъонхэр дахэу зэрагъэфагъэх. Гумэ Ларисэ, Исаева Анжелэ, нэмыкIхэм ялъэпкъ IэшIагъэхэр, Адыгэ Республикэм лъэпкъ культурэмкIэ и Гупчэ иIофышIэхэм яIэпэщысэхэр гъэшIэгъоныгъэх. Унагъом ищыкIэгъэ пкъыгъохэр, нэпэеплъ шIухьафтынхэр, фэшъхьафхэри лъэгъупхъэх.
Цурмыт Рузанэ иадыгэ саехэр дахэх. Нэбгырэ пшIы пчъагъэ къакIэупчIэ. Сэе фыжьым нэфынэу къытепсэрэм пчэгур нахь къегъэшIэты. «Адыгэ пшъашъэу саер зыщызылъэщтым Тхьэр етагъ» зыфэпIощт гупшысэр зыдэпIыгъэу фэшъхьаф шъуашэхэм, тхыпхъэхэм уяплъы.
Тыркуем, Сирием, Иорданием, Косовэ къарыкIыжьыгъэхэ тилъэпкъэгъухэр, хьакIэхэу ягъусэхэр бэ хъухэу къэгъэлъэгъонхэм яплъых. ЗэлъашIэрэ сурэтышI-модельерэу СтIашъу Юрэ Iофтхьабзэм хэлажьэхэрэр пэгъокIыгъэх, имэфэкI мафэ фэгъэхьыгъэу фэгушIуагъэхэм ащыщых Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан, Хэсашъхьэм хэтхэр, республикэм щыпсэухэрэ къэндзалхэм якупэу «Дуслыкым» ипащэу Алям Ильясовыр, культурэм, искусствэм яIофышIэхэр, бзэхэр зыщызэрагъэшIэрэ Гупчэу «Активым» ипащэу Едыдж Мэмэт, ныбджэгъухэр.
Пчыхьэзэхахьэр зезыщагъэхэ Беданыкъо Замирэрэ Нэгъой Зауррэ адыгэ шъуашэм икъэбар лъэпкъым итарихъ зэрепхыгъэр къаIотагъ. ЛIыгъэм ишапхъэ итэу хъулъфыгъэр зекIозэ шъуашэр зэрехьэ. Бзылъфыгъэм шъэбагъэу, дэхагъэу хэлъыр ишъуашэ къегъэлъагъо. Цыер е саер тарихъым зэрэщашIэрэр лъэпкъ шэн-хабзэхэм япхыгъэу зэрэщытри пчыхьэзэхахьэм къыщаIотагъ.
Адыгэ шъуашэм и Мафэ республикэм ихэбзэ унашъокIэ агъэмэфэкIы. Правительствэм, Парламентым якъулыкъушIэхэр, общественнэ движениехэм ахэтхэр хэлажьэх.
Къэралыгъо телерадиокомпаниеу «Адыгеим» ижурналистхэм къагъэхьазырыгъэ едзы-гъоу адыгэ шъуашэм ехьылIагъэр филармонием къыщагъэлъэгъуагъ.
Адыгэ Республикэм и Къэралыгъо академическэ къэшъокIо ансамблэу «Налмэсыр», республикэм и Къэралыгъо орэдыIо-къэшъокIо ансамблэу «Ислъамыер», Къэралыгъо филармонием иэстрадэ купэу «Ошъутенэр», кIэлэцIыкIу къэшъокIо купэу «Нартыр», пщынаоу ГъукIэлI Батыр, орэдыIохэу Еутых Вячеслав, Беданыкъо Замир, Мышъэ Азидэ, Нэгъой Заур, нэмыкIхэри мэфэкIым хэлэжьагъэх. Адыгэ орэдхэмкIэ, къашъохэмкIэ, лъэпкъ мэкъамэхэмкIэ тагъэгушIуагъ. СтIашъу Юрэ концертым ыцIэ къыщыраIуи, имэфэкI пае залым чIэсхэр фэгушIуагъэх.
МэфэкI зэхахьэр адыгэ джэгукIэ аухыгъ.
Адыгэ Республикэм ипресс къулыкъу
Comments
Post a Comment