Адыгэ Республикэм и ЛIышъхьэ къощ Республикэу Къэбэртэе - Бэлъкъарым кIуагъэ

Адыгэ Республикэм и ЛIышъхьэу КъумпIыл Мурат республикэхэм азыфагу илъ зэдэлэжьэныгъэм тегъэпсы­хьагъэу тыгъуасэ Налщык кIуагъэ.

Къэбэртэе-Бэлъкъар Рес­публикэм и ЛIышъхьэ ипшъэ­рылъхэр пIэлъэ гъэнэфагъэкIэ зыгъэцэкIэрэ КIокIо Казбек зэрэригъэблэгъагъэм тетэу сэнаущыгъэ зыхэлъ кIэлэцIыкIухэм якъыхэгъэщынрэ ахэм IэпыIэгъу ятыгъэнымрэ атегъэпсыхьэгъэ Iофтхьабзэхэм ар ахэлэжьэщт.

Къэбэртэе-­Бэлъкъарым къэ­кIуагъэх Къэ­рэщэе-Щэр­джэс Респуб­ли­кэм и ЛIышъхьэу Тем­резов Рэщыдэрэ Ставрополь краим игубернаторэу Владимир Владимировымрэ.

Шъугу къэтэгъэкIыжьы: илъэ­сэу икIыгъэм чъэпыо­гъум лъэныкъуищ зэIукIэгъу Мые­къуапэ щызэдыряIагъ Къэрэщэе-Щэрджэсым, Къэбэр­тэе-Бэлъкъарым ыкIи Адыгеим ялIышъхьэхэм. Джащыгъум республикэхэм азыфагу ­илъыщт лъэныкъуищ зэдэлэжьэныгъэм ехьылIэгъэ зэ­зэ­гъыныгъэм кIэтхэгъагъэх. Iофтхьабзэхэу зэдызэшIуахыщтхэр анахьэу зыфэгъэхьыгъэщтхэр 2022-рэ илъэсым республикэхэм автономие зяIэр илъэси 100 зэрэхъущтыр ары.

Адыгеим и Мафэхэр Къэ­бэртэе-Бэлъкъарым, Къэрэщэе-Щэрджэсым ащызэха­щэщтых, а республи­кэхэм яп­хыгъэ Iофтхьабзэхэри Адыге­им щырекIокIыщтых.

Адыгэ Республикэм ипресс къулыкъу