Щылэ мазэм и 11-м, Адыгэ Республикэм ит къалэу Адыгэкъалэ 2019-рэ илъэсыкIэу тызхэхьагъэм апэрэу къыщыхъугъэр шъэожъый. Къызэрыхъухьагъэр Цуякъо зэшъхьэгъусэхэу Аскэррэ Зарэрэ яунагъу. ЯплIэнэрэ сабыеу къафэхъугъэм Долэт фаусыгъ. Джащ фэдэу къызэрэщэхэрэр щызэгуатхэрэ унэу ЗАГС зыфиIорэм икъутамэу Адыгэкъалэ дэтым ипащэу Цопсын Бэллэ къыщиIуагъ гъэзетэу Адыгэ макъэм.
МэфэкI шIыкIэм тетэу рагъэкIокIыгъэ Iофтхьабзэм ЗАГС-м иIофышIэхэм Долэт цIыкIур къызэрэхъугъэр къэзыушыхьатырэ тхылъыр янэ-ятэхэм щаратыжьыгъ, ялъфыгъэ цIыкIухэм псауныгъэ пытэ яIэнэу, еджэгъэшхо, насыпышIо, бэгъашIэ хъунхэу афэлъэIуагъэх, шIухьафтынхэри афашIыгъ.
Ащ пыдзагъэу Цопсын Бэллэ къызэриIуагъэмкIэ, илъэсэу дгъэкIотэжьыгъэм Адыгэкъалэ къыщыхъугъэу щатхыгъэр сабый 218-рэ. Ахэм ащыщэу пшъэшъэжъыехэр 102-рэ, шъэожъыехэр 116-рэ. ИкIыгъэ илъэсым зэгуатхагъэр нэбгыри 102-рэ.
Comments
Post a Comment