Урысые Федерацие: ПашIо Алый ятIуанэрэ чIыпIэр къыдихыгъ

Нэпсэу Бислъан - ПашIо Алый

Урысые Федерацием истудентхэм дзюдомкIэ язэнэкъокъу Москва щыкIуагъ. Штымэ Чыназ, ПашIо Алый, Тулпэрэ Айдэмыр Адыгэ Республикэм ыцIэкIэ алырэгъум щыбэнагъэх.

Адыгэ Республикэм игъэшIуагъэ гъэсакIоу Бастэ Сэлымрэ гъэсак1о-кIэлэегъаджэу Нэпсэу Бислъанрэ республикэм илIыкIо­хэм пэщэныгъэ адызэрахьагъ. Урысыем иапшъэрэ еджэ­пIэ 40-м ехъумэ ястудент 200-м нахьыбэ зэнэкъокъухэм ахэлэжьагъэх.

Адыгэ Республикэм испортсмен анахь дэгъухэу къыхахыгъэхэм ащыщэу ПашIо Алый килограмм 60-м нэс къэзыщэчыхэрэм ябэныгъ. ПэшIо­рыгъэшъ зэIукIэгъухэр А. ПашIом «къабзэу» къыхьыгъэх. Апэрэ чIыпIэм фэбэнэгъэнымкIэ зэнэ­къокъур къинэу кIуагъэ. Дагъы­стан къикIыгъэ Лабазановым Алый ебэнызэ, шIыкIэу къыгъэ­лъэгъуагъэм судьям уасэ къы­фишIи, текIоныгъэр къыдихыгъэу ылъытагъ, ау къыдезымыгъэшта­гъэхэр судьяхэм къахэкIыгъэх. Бэнэгъум зыпаублэжьым, Дагъы­стан къикIыгъэр нахь чанэу зе­кIуагъэу судьяхэм унашъо ашIи, апэрэ чIыпIэр фагъэшъошагъ.

ЗэIукIэгъур зэрэкIуагъэм сурэтэу тырахыгъэм зеплъыжьхэм, ПашIо Алый текIоныгъэр къыдихыгъэу судьяхэм унашъо ашIын фэягъэу зэхэщакIохэм къаIуагъ. Гур бгъэрэхьатыным фэшI ащ фэдэ еплъыкIэхэм мэхьанэ яоты, ау судьяхэм унашъоу ашIыгъэр зэблахъужьырэп.

ПашIо Алый ятIонэрэ чIыпIэр къызэрэдихыгъэр гъэхъагъэкIэ фэтэлъэгъуми, дышъэ медалыр «IэкIахыгъэу» плъытэ хъущт.

Адыгэ Республикэм ипресс къулыкъу

Comments