Къэбэрдей-Балъкъэрым и турист-рекреацэ комплексыр зэпымыууэ зэрефIакIуэм къыхэкIыу транспортым и лэжьыгъэми зегъэужьын хуейщ. Абы и лъэныкъуэкIэ зэфIагъэкIхэмрэ зэкIэ щыIэ хэкIыпIэхэмрэ тепсэлъыхьащ КъБР-м Транспортымрэ связымкIэ и къэрал комитетым и унафэщI Къудей Арсен.
«Транспортым и IэнатIэм зегъэужьыныр» Урысей Федерацэм и къэрал программэр гъэзэщIэным трагъэкIуэдэну ахъшэр УФ-м ФинансхэмкIэ и министерствэм зэригъэмэщIам къыхэкIыу Къэбэрдей-Балъкъэр Республикэм и унафэщIхэм яубзыхуащ Налшык и аэропортыр ирагъэфIэкIуэн папщIэ уней мылъку къагъэсэбэпыну.
Иджыпсту аэропортым хиубыдэу яухуэ терминалым псори зэхэту метр зэбгъузэнатIэ мини 10,5-рэ къикIыу щытынущ икIи абы илъэс къэс пассажир мин 500 щызэблэкIынущ. Ухуэныгъэм текIуэдэнущ сом мелуан 900-м щIигъу. Апхуэдэ проектышхуэр пхыгъэкIыным пыщIауэ документ куэд, абыхэм мылъкур зыIэщIэлъыр убзыхуныр, кадастр паспортхэр тхыныр хиубыдэу, гъэхьэзырын хуейщ. Нобэм ирихьэлIэу а псори зэфIагъэкIащ.
Ауэ Налшык аэропортым кхъухьлъатэхэр щылъатэ икIи къыщетIысэх и губгъуэри ирагъэфIэкIуэн, абы и техническэ зэфIэкIым хагъэхъуэн хуейщ. Урысейм Транспортымрэ связымкIэ и министерствэм зыхуеину документ псори зэригъэпэщащ «Урысейм и транспорт IэнатIэм зегъэужьыныр (2010-2020 гъэхэм)» федеральнэ программэ хэхам хиубыдэу а губгъуэр зэгъэпэщыжыным икIи абы текIуэдэну ахъшэр 2018 гъэм щегъэжьауэ федеральнэ бюджетым къыхэгъэкIыным ехьэлIауэ. Лэжьыгъэхэр яуха нэужь Налшык къалэм и аэропортым сыт хуэдэ кхъухьлъатэ лIэужьыгъуэхэри къыщытIысыфынущ. Апхуэдэу нэхъыбэ хъунущ къэрал кIуэцIми къэрал щIыбми щызекIуэ кхъухьлъатэхэм я бжыгъэр. Псори зэхэту къагъэсэбэпыну ахъшэр сом меларди 3-м ноблагъэ», – жиIащ Къудей Арсен.
КъБР-м и Iэтащхьэмрэ Правительствэмрэ я пресс-IуэхущIапIэ.
Адыгэ Псалъэ
Comments
Post a Comment