Адыгэ Республикэм щыщ бэнакIохэм медалхэр Европэм къыщахьыгъэх

Сурэтым итхэр: Нэпсэу Бислъанрэ ПашIо Алыйрэ.

Европэм иныбжьыкIэхэм дзюдомкIэ язэнэкъокъу Испанием щыкIуагъ. Адыгэ Республикэм щыщ бэнакIохэу ПашIо Алыйрэ Щыгъущэ Амиррэ Урысые Федерацием ихэшыпыкIыгъэ командэ хэтхэу зэIукIэгъухэм ахэлэжьагъэх. Джащ фэдэу гъазетэу Адыгэ Макъэм къетхы.

ПашIо Алый килограмм 55-м нэс къэзыщэчырэмэ якуп тыжьын медалыр къыщыдихыгъ. къуаджэу Джыракъые щапIугъэ бэнакIом илъэс 21-м нэс зыныбжьхэм язэнэкъокъу щысэшIу къыщигъэлъэгъуагъ. Дышъэ медалым пэблэгъагъ, ау иIэпэIэсэныгъэ икъоу ыгъэфедэн ылъэкIыгъэп.

Щыгъущэ Амир, кг 66-рэ, Европэм ихэгъэгухэм яхэшыпыкIыгъэ командэхэм язэIукIэгъухэм ахэлэжьагъ, джэрз медалыр къыфагъэшъошагъ.

А. Щыгъущэр Мыекъуапэ щыщ, тренер-кIэлэегъаджэу Роман Оробцовыр ипащ. Мыекъопэ къэралыгъо гуманитар-техническэ колледжым юристэу щеджэ.

— Адыгэ къэралыгъо университетым физкультурэмкIэ ыкIи дзюдомкIэ и Институт ПашIо Алый щеджэ. БэнэкIо ныбжьыкIэр зыгъэсэрэр Нэпсэу Бислъан. 


Comments