Адыгэхэм я махуэм хиубыдэу Iуащхьэмахуэ районым Iуэху пыухыкIахэр щаубзыхуащ. Тырныауз къалэм Кулиев Къайсын и цIэр зэрихьэу дэт ЩэнхабзэмкIэ унэм щыIэ район музейм щIадзауэ щагъэлъагъуэ «Адыгэхэр: лъэпкъым и тхыдэм щыщхэр» выставкэр.
Абы утыку къыщрахьащ мы махуэшхуэр зэрагъэувам, адыгэ лъэпкъым и къекIуэкIыкIам щыхьэт техъуэ тхыгъэхэр, экспонатхэр. Выставкэр дызэрыт мазэр иухыху псом я дежкIи зэIухауэ щытынущ.
Iуащхьэмахуэ районым и библиотекэхэм фокIадэм и 16-м усэмкIэ пшыхьхэр, гъэлъэгъуэныгъэ зэмылIэужыгъуэхэр щекIуэкIынущ.
Районым и къуажэ псоми щэнхабзэмкIэ я унэхэм фокIадэм и 19-м концертхэр щызэхэтынущ, выставкэхэр щагъэлъэгъуэнущ. А махуэ дыдэм школым и еджапIэхэм къыщызэрагъэпэщынущ Адыгэхэм я махуэм теухуа дерсхэр.
Тырныауз къалэм гъуазджэмкIэ и сабий школым, Абаев СулътIанбэч и цIэр зезыхьэм, фокIадэм и 20-м сыхьэт 13-м щагъэлъэгъуэнущ «Дыщалъхуа щIыналъэрщ ди къарум и хэкIыпIэр» махуэшхуэ концертыр.
Дауэдапщэхэм хэтынущ район, къалэ администрацэхэм я лIыкIуэхэр, къуажэхэм я Iэтащхьэхэр, «Адыгэ Хасэ» жылагъуэ зэгухьэныгъэм и район къудамэм и унафэщIхэр, районым и IуэхущIапIэхэм, предприятэхэм, организацэ- хэм я Iэтащхьэхэр. А махуэм сыхьэт 14-м районым ЩэнхабзэмкIэ и унэм щагъэлъэгъуэнущ адыгэхэм я тхыдэмрэ я хабзэхэмрэ ятеухуауэ кинорежиссёр Вэрокъуэ Владимир триха документальнэ фильм щхьэхуэхэр.
Тарим Алисэ, Адыгэ Псалъэ
Comments
Post a Comment